تحليل المقاصة : التحليل علي طريقة (بكر) ... الصراحة يعني!

كتب : أيمن محمد

تحليل المقاصة : التحليل علي طريقة (بكر) ... الصراحة يعني! 29910-maqasa_350

في كل مرة احاول تقديم طريقة جديدة في التحليل حتي لايشعر القارىء بالملل من النواحي التكتيكية وفي هذه المرة احاول ان اقدم تحليل مباراة الاحتفالية بطريقة جديدة ومبتكرة الا وهي تقمص روح احد اكثر معلقي كرة القدم فكاهة في الفترة الاخيرة القدير محمود بكر ومع تألقه اللافت هذا الموسم واكماله التألق بموضوع تورتة الامس وجدت انه من الضروري جدا ان نذكره في اخر تحليلات الموسم الكروي المصري.. لذا سنتخيل معا ان المعلق المحبوب ذات الضحكة المجلجلة والافيهات هو من يحلل المباراة برؤويتي الفنية وباسلوبه المحبب للجماهير

تحليل المباراة

· كل مرة يفاجئنا بيها جوزيه بتشكيل جديد بس الصراحة يعني هو تشكيل بيقول فيه للاعيبة كل واحد يدي اللي عنده عشان كده دفع بسعيود واسامة وشبانة ووراهم ايمن اشرف وشهاب وشوقي ومانجا اللي الموسم بتاعه جه .. وفي الدفاع سمير والعش وربيعة ومعاهم ابوالسعود اللي عايز يقول لجوزيه اني جامد اوي ولازم اخد معاك فرصة

· اما المقاصة ومدربهم طارق يحيي فنازل بالقوة الضاربة وبيقولك اهلي مش اهلي انا عاوز المركز الرابع فعشان كده حط العيدروسي وعمر النجدي وحسين حمدي ونحط عينينا عليه ووراهم صاروخ وايمن عبدالعزيز وفؤاد سلامة والولد ابوشعر اللي اسمه احمد ماهر وحد يقولي ده عامل كده ليه اقوله اللي ماشفش شعر شطة زمان يشوف شعر احمد ماهر وفي الدفاع انتوا عارفين بقي ومعاهم مصطفي كامل والبرجاوي بيقولي اسمه كمال هاقوله خلاص ياسيدي عندي دي بس ياريت متقطعش الصوت عليا وانا بذيع

تحليل المقاصة : التحليل علي طريقة (بكر) ... الصراحة يعني! 29910-maqasa_1

تحليل المقاصة : التحليل علي طريقة (بكر) ... الصراحة يعني! 29910-maqasa_1

· تحركات شبانة حلوة اوي والراجل ده بيحاول يثبت نفسه ولا ايه.. مش عارف ايه الفرق بينه وبين السيد حمدي الاتنين مش رووس حربة صرحاء وبيتهيألي ان الاهلي هيخسر كتير لو اده بتروجيت الولد ده وجاب حسين حمدي قصدي السيد حمدي ولا ما هو عاوز الاتنين السيد وحسين مافرقتش كتير بس الصراحة جوزيه بيجيب اللي هو عايزه وبيفوز بالدوري وهو ده اللي عاوزاه الجماهير .. انا ايه دخلي بقي .. على العموم خسارة ان شبانة يمشي من الاهلي وانا قلتها ورزقي على الله

· ادينا مركزين على حسين حمدي مشفناشي منه حاجه جامدة ويقولك سبعة مليون وحاجات كده غريبة والولاد الصغيرين العش وربيعة مسيطرين تمام وبعديني يجوا يقولولك عاوزين دوادار مش دويدار انا اسكندراني وبقولها كده ياعم طب شوف الشباب اللي عاملين ماتش كويس الصراحة يعني

· شوقي وشهاب تحس انهم اسطوات امبارح قالولك كل اللي حوالينا لسه صغيرين فكانوا عاوزين يشغلوهم وكانوا مكسلين يجروا بس ده ميمنعش انهم بيبقوا جامدين قوي في الماتشات اللي هيه وافتكروا جول شهاب في ماتش الاتحاد الليبي ايام البدري اللي ادي فرصة للشباب بس الصراحة الاهلي عاوز بطولات برضه الجمهور يقولك شباب مش شباب احنا عاوزين بطوله

· سعيود افتكر نفسه ميسي بجد فعشان كده جوزيه طلعه وقاله اقعد جنبي هنا ع الدكة ويا سلااااااااام نزل احمد حسن الراجل ده محترف بجد حد يقولي تقصد جوزيه ولا حسن .. اقوله الاتنين لانهم عارفين يعني ايه معني الاحتراف واحد بينزل لاعب عارف انه ماشي ماشي والتاني بيلعب زي ما يكون ناشىء بيثبت نفسه وعشان كده هههههههه لسه بقول لحضراتكم معني الاحتراف وادي احمد حسن جاب جول عالمي الصراحة يعني وياتري ده هيأثر في قرار لجنة الكووورة بتاعة الاهلي اقولهم ان حسن حمدي والخطيب وكابتن طارق سليم ربنا يشفيه مابيتاثروش بالحاجات دي واللي يهمهم مصلحة النادي الاهلي

· حد يقولي يا كابتن بكر يعني الموضوع ده مكنش ليه حل ... اقوله المشكلة ان الصقر عاوز يلعب اساسي ومفيش حد بيضمن كده..ونفسه يلعب مع المنتخب مع اني في حاجة محدش واخد باله منها ان الناس اللي هتيجي تمسك المنتخب ممكن ماتضمش اللعيبة الكبار مش هو ده اللي قعدوا يقولوه بعد ماتش جنوب افريقيا بس يلا الناس اصلها بتنسي بس الصراحة احمد حسن هيخسر كتير لو راح نادي تاني في مصر واحسن له يروح نادي بره ولو ليه نصيب يلعب في المنتخب هيلعب ويوصل لعمادة العالم اللي هي حلم حياته وده حقه ولو مالوش فمفيش حد هيقدر يقلل من لاعب خد 4 كؤوس افريقية ومرتين احسن لاعب في بطولة افريقيا ونرجع للماتش تاني

تحليل المقاصة : التحليل علي طريقة (بكر) ... الصراحة يعني! 29910-maqasa_2

تحليل المقاصة : التحليل علي طريقة (بكر) ... الصراحة يعني! 29910-maqasa_2

· اوه ه ه ه ه ه ه ..جونين في دقيقة واحدة حد يعمل كده ياراجل قصدي على ابوالسعود والجون اللي دخل فيه بس معلش محدش يقسو عليه اوي وافتكروا الشناوي حارس المصري اللي كسر الدنيا في مباراة الزمالك وبعديها كامل ابوعلي طلب فيه 40 مليون يورو تقولش بوفون ..جه في ماتش سموحة وادي جون هدية لسموحة متقولش هدية عيد الفطر واهو كل سنة وانتوا طيبين ورمضان جاي علينا

· انا قصدي اقول ان ابوالسعود كان كويس في الشوط الاول وباستثناء الهدف العجيب ده كان بقي من نجوم المباراة بس يلا مش عاوزين نتكلم على التحكيم اللي قعد الاهلي ناقص واحد من ساعة ماخرج العش مصاب وتريكة عاوز ينزل واللعب مش عاوز يقف عشان تريكة ينزل .. بس هنقول ايه اهو ده التوفيق وعدم التوفيق

· وادي سيد معوض كمان بيلعب وخرج شبانة وساب الشيخ اسامة في الملعب قالك يمكن يجيب جون بركة زي ماتش سموحة وجوزيه اصله معلم.. قرص ودن معوض وبعدين قالوا خلي بالك المرة الجاية هتكون مش معايا وبعدين الراجل ده حدوتة قلب الماتش وخلي مانجة اللي النهاردة مش في اوانه يلعب في خط النص وخلي ربيعة باك يمين وايمن اشرف وسمير مساكين وسيد معوض باك شمال وقلب الخطة الي 4/4/2 او زي مابيقول الجداد 4/2/3/1 ياعم ماهي كلها مشتقات... على ايام عزالدين يعقوب وسمير قطب وعبده نصحي كنا بنلعبها كده بس هي افتكاسات الشباب بتوع اليومين دولي

· هاهاهاهاهاها ... الراجل مهنش عليه يعكنن على الجماهير والتورته الحلوة اللي جابوها وحسب ضربة جزاء فيها شك الصراحة بس احمد حسن لبسها لمعاذ الحناوي .. الا حد يقولي مش معاذ الحناوي ده برضة ناشىء في الاهلي اقوله روح قول لمستر مانويل اني ماليش دعوة وسيبني اكل عيش .. واللي كان قاعد في البلكونه بيشرب سيجارة اقوله ان الاهلي اخد الدوري وماخسرش ولا ماتش مع جوزيه اللي اثبت انه مدرب جامد اوي مع الاهلي بس مش عارف ليه مش بيبقي جامد بره

· اكلوها وشربوها الناس اللي قعدت تقول احنا ابطال الدوري الحقيقين وياعيني خلوا بعض الناس تصدقهم لكن الاغليبة من جماهيرهم دلوقتي عرفت انهم ضحكوا عليهم عشان يعيشوهم الوهم وعلى راي بتوع الالتراس يعني ايه الدوري .. يعني كله يعيش الوهم والاهلي ياخد الدوري

مشكور موضوع رائع

» شاهد كيف عاد تريكة ليقتنص صدارة هدافي الأهلي في مباراة المقاصة
» طريقة عمل الدجاج على طريقة kfc (كنتاكى)
» مدرب المقاصة: الإعلام الأحمر سبب لنا ضغطا نفسيا وعصبيًا
» ماذا يعني تمثال لشخص ما راكب فوق حصان ..
» اهداف مباراه الاهلي × مصر المقاصة في ختام الدوري العام المصري